DEKO BOKO徐遊日誌

食完午飯，我地返旅館放低行李，就趕去雕刻之森美術館啦~

其實呢個美術館我地2年前都去過1次~

今次再去既原因係因為佢...我地兔界既星級代表 - miffy 舉行期間限定既展覽會!!!

佢1直係我既偶像，所以1定要去支持下~~~

嘩... 會場佈置得好可愛呀... 就好似處身繪本內既場景一樣...

有小屋、樹林、小鳥、鴨子... 仲有互動既雨景屏幕... 唔只小朋友玩得開心，

就連我地呢2個大細路都興奮不已...

唔好以為小屋只係平面既佈景版呀... 小屋係有2層，有樓梯連接，可以行上去參觀架~

 

有圖為証，呢對小情侶係個雨景屏幕前面玩得幾開心...

順帶一提... miffy既國藉其實係荷蘭而唔係日本，佢爸爸係荷蘭繪本作家Dick Bruna，

1955年第1本繪本正式面世，對象為6歲以下既小朋友，經歷60個年頭仍然深得大小朋友既愛戴，

miffyさま真係好厲害哦~~~

 

睇完展覽，當然唔可以錯過紀念品啦~~

由於係日本住左一段時間，抵抗誘惑既能力已大大提高，

所以我只係買左件miffy x graniph既限定版t-shirt就已經好滿足了~

哎呀... 美術館要關門啦... 無時間行出去影相呀... 嗚嗚嗚...

無辦法啦... 反正天氣都唔好... 有時間都影得唔靚啦...

我地仲要去宮之下車站附近既特色cafe... naraya cafe嘆咖啡~~