magic moment@Champs-Elysees－DEKO BOKO徐遊日誌

話敢快，我地就黎到凱旋門啦～

由我地住宿旅館既Saint George地鐵站出發，唔駛20分鐘就已經黎到凱旋門位處既香榭麗舍大道～

其實去之前本來就無咩期望，因為呢類超人氣景點通常都係被過份吹噓，

親身去到直情有d失望，因為香榭麗舍大道兩旁既商店全部都係耳熟能詳既名店，

LV、Cartier、Zara、Gap等等，同平時行尖沙咀既廣東道可謂分別唔大。。。

而凱旋門其實都好靚好宏偉既，可惜佢位處大馬路既交匯處，

無論點樣既角度都係會影到川流不息既汽車，感覺格格不入。。。

雖然之前講過香榭麗舍大道既商店無咩特別，

但超人氣macaron店子LADUREE你就1定1定唔可以錯過！！

我地去個日係平日，但店裡面已經大排長龍，為既就係佢地既名物macaron~

妹妹千叮萬囑我1定要去呢度買macaron，雖然我並唔係特別鐘意食，

不過難得黎到，點都要買黎試試既～

店子裡面既macaron放係偌大開放式玻璃櫃內，十多款唔同味道既macaron顏色鮮豔奪目，

（可惜店內唔可以影相。。。）

自由選好自己喜歡既味道後店員就會將佢地放係一個精美既小盒子裡面，

雖然價錢唔平，但整個選購過程十分愉快，感覺有如選購一件令人稱心滿意既首飾一樣～

買左之後我唔捨得食，結果等到返香港先食，

估唔到隔左幾日雖然有少少熔但仍然好好味，甜度岩岩好，

比起之前係香港食過既實在好太多太多啦。。。

行完影完相都不過係6點幾7點，時間雖然尚早，但我地已經餓到肚仔打鼓了。。。

之前聽過唔少人講過去法國餐廳受到不禮貌對待既經驗，所以事前都做足功課，

搵好晒食飯既地方，以免亂打亂撞～

deko，你睇下 d 露天茶座好似好正好relax敢哦。。。

係就係好似好relax，但我已經行到滴晒汗，坐係露天地方睇怕我會熱到融左。。。

哈哈，放心啦，我知你怕熱，我已經事先搵好餐廳架啦。。。跟我黎啦～

呢間位於香榭麗舍大道既leon de bruxelles 既餐廳就係我地今晚開餐既地方啦～

呢間食比利時淡菜既leon de bruxelles 得到唔少朋友同網上既好評，主要原因就係因為平靚正～

要知道係歐洲地方食一餐好少少既動輒一千幾百，而呢間餐廳既set 大約都係10幾20歐羅，

已經包括appetizer，一鍋滿滿既青口，再加無限量添食麵包＋薯條，1個set基本上已經夠2個人食。。。

係歐洲黎講呢個價錢呢個份量可以話係超值！！！

除左超值外，侍應既服務態度亦都值得一讚，笑容可掬，服務又慇勤，

令我地對巴黎既第1頓晚餐留下1個好愉快既回憶！